Kurset private me nxënësit e shkollës, mësuesit rrezikojnë vendin e punës

Inspektorët e drejtorive arsimore, kontrolle dhe verifikime të denoncimeve.

Të
gjithë nxënësit që nuk kanë mundësi ekonomike, familjet e tyre me
vështirësi përballojnë kostot e jetesës, por ndodhen nën presionin e
kurseve private, kanë një rrugëzgjidhje.

Denoncimin e mësuesve,
që në një mënyrë apo në një tjetër ushtrojnë preson te nxënësit e
shkollave ku japin mësim për të përfituar para në këmbim të konsultimeve
pas mësimit, mund ta bëjnë nxënësit apo edhe prindërit e nxënësve.
Drejtoria e shkollës, Drejtoria Arsimore apo edhe Ministria e Arsimit ka
deklaruar se në bazë të udhëzimit të ministrit të Arsimit, Myqerem
Tafaj, janë të hapur për të nisur kontrollet, inspektimet dhe
verifikimet e ardhura nga komuniteti.

Po jo vetëm kaq, për të
shtruar në diskutim çështje të tilla, për të diskutuar dhe për të marrë
vendime lidhur me problematika e fenomene të tilla, parashikohet edhe në
ligjin e arsimit parauniversitar, që bordi i shkollës të marrë vendime
të propozojë e të çlirojë fëmijët e nxënësit nga presione të tilla.

Bordi
i shkollës, nxënës, prindër e i gjithë komuniteti duhet të mbajnë
parasysh se ligji, rregulloret dhe udhëzimet parashikojnë që mësuesit që
bëjnë kurse private me nxënësit e shkollave, në rast se denoncohen dhe
inspektohen, atëherë rrezikojnë masa administrative deri në largim dhe
humbje të vendit të punës.

Konkretisht, para Maturës Shtetërore
2011, para çeljes së provimeve të vitit të fundit të gjimnazit, të
gjithë nxënësit që nuk kanë arritur të përfitojnë dije maksimale, që
kanë munguar apo për shkak të mundësive financiare nuk mund të paguajnë
një mësues privat që t’u shkojë në shtëpi, mund të kërkojnë konsulta pas
orës së mësimit.

Të gjitha shkollat që janë me klasa të zëna
paradite dhe pasdite si pasojë e zhvillimit të mësimit me dy turne,
duhet të gjejnë rrugën e mesme dhe drejtoritë kanë për detyrë të
menaxhojnë dhe të administrojnë konsultat.

Sipas udhëzimit të
ministrit të Arsimit, drejtoria e shkollës duhet të përcaktojë me
grafikë javorë dhe periodikë, në bazë të kërkesave të nxënësve,
konsultat, numrin e nxënësve në klasa, oraret si dhe duhet të njoftojë
mësuesit e lëndës për marrjen e masave dhe administrimin e lëndës në
favor të kërkesave të nxënësve.

Sipas Ministrisë së Arsimit,
“legalizimi” i kurseve apo konsultave nuk do të sjellë shfarosjen e
kurseve private, por të paktën është një fillim i mirë për të çrrënjosur
këto metoda fitimprurëse për mësuesit, sidomos për arsimtarët e
shkollave të mesme.

Shqip