Kuli “çmonton” Skënderbeun, Shkëlqim Muça s’fiton dot në Peqin

Ka inaguruar tapetin e ri të blertë, për herë të parë i vendosur në Peqin, dhe e ka kurorëzuar gjithcka me fitore. 3 gola, të shënuar nga i njëjti autor, Bekim Kuli, i konsideruar “armik” në Peqin, për vite me radhë, por që tani është shndërruar në benjaminin e tifozërisë bardhekaltër. 3 gola për 3 pikë, që kanë “zhvirgjëruar” edhe portierin e Skënderbeut, Orges Shehi. Nëse porta e skuadrës juglindore, e konsideruar si pretendente në këtë edicion, me investime të mëdha financiare, nuk kishte pësuar asnjë gol në dy javët e para të kampionatit, java e 3-të ka rezultuar fatale. Shkëlqim Muca pëson disfatën e radhës në Peqin, aty ku nuk ka fituar dot asnjëherë edhe vjet, në katër sfidat e edicionit të shkuar, në krye të Dinamos, që e shpallte kampione. Ajo cka mund të thuhet për këtë ndeshje të shumëpritur, është se Shkumbini ka fituar jo vetëm me rezultat, por edhe me lojë. Duke “çmontuar” pa shumë probleme Skënderbeun e Korçës, që ka shfaqur probleme të mëdha në mbrojtje, vecanërisht në krahun e Endri Vrapit. I cili ka “gatuar” edhe golin e 3-të të Kulit, pas një gafe në dyluftimin që pati me Gjylën. Fitorja e parë e Shkumbinit në këtë kampionat, debutim i suksesshëm i trajnerit Agim Canaj, që pason në këtë post Mirel Josën e shkarkuar pas humbjes në Lac. Humbja e parë e Skënderbeut, i cili, me cka zhvilloi në Peqin, tregoi se mbetet një pretendent potencial në letër, jo aq në fushën e blertë. Ndeshjet në vazhdim do ta tregojnë më mirë këtë gjë, ndoshta…