Alba Mecaj Top Modelja e ardhshme

Pas një muaji vendosje dhe ndërprerje takimesh, unë dhe Alba duket se do të takohemi më në fund. Sesioni fotografik që kishte të planifikuar për në drekë është shtyrë për nesër, kështu që skedula e saj është plotësisht e lirë. Fillimisht, kur e kontaktova për të bërë këtë shkrim prezantues tek “SH2″, ajo u mendua pak dhe si me mosbesim më pyeti, nëse vërtet do të ishte diçka me interes për lexuesin…

Një pyetje e tillë më bëhet shpesh herë nga të rinjtë shqiptarë në Amerikë, të cilët kanë filluar të njohin një sukses të konsiderueshëm në karrierën e tyre, pasi qëndrimi dhe aktiviteti kaq larg vendit i bën të ndihen disi të harruar. Veç, unë vdes për të dëgjuar dhe për të treguar histori të suksesshme, ku bashkatdhetarët tanë po krijojnë një emër të tyrin dhe në kontinentin amerikan në të cilin, më shumë se në çdo vend tjetër konkurrenca është e jashtëzakonshme. Alba është nga Fieri (qytet, të cilin e vizitoi vjet dhe mezi pret të rikthehet sërish). Familja e saj u largua drejt Amerikës, kur ajo ishte vetëm njëmbëdhjetë vjeçe.

Momentalisht ndjek studimet në “Hunter College”, ndërsa shkollën e mesme e kreu në Nju Jork, ku dhe filloi të aktivizohet në aktivitete të ndryshme kulturore për fëmijë. Pavarësisht se tani po njeh sukses në fushën e modelimit, ëndrra e saj e vërtetë është kënga. Në fakt, fillimet e saj të para, Alba i ka pasur si këngëtare. “Më pëlqen shumë të këndoj! Që në fëmijëri kam pasur ëndërr të bëhem këngëtare dhe vazhdoj ta kem si synim. Ndoshta duket pak ironike, por dhe si modele jam zbuluar gjatë një koncerti. Për momentin do të vazhdoj të merrem me modelim, por dhe këngën nuk e kam dorëzuar ende.” Teksa thotë këtë, më pyet nëse e mbaj mend këngën “Scrubs” dhe fillon të këndojë. Më pas më tregon se është kontaktuar nga një producente që ka bashkëpunuar me T.L.C për t’u bërë pjesë e një grupi muzikor, së bashku me dy vajza të tjera, por ajo ende nuk ka vendosur, sepse momentalisht ka aq shumë “gjëra në pjatë” dhe dëshiron që të bëjë zgjedhjet e duhura. Takohemi pranë rrugës 14, ku midisturmës së njerëzve më në fund dallojmë njëri-tjetrin.

Ka veshur një palë xhinse të ngushta dhe një xhaketë të shkurtër lëkure, e me flokët e kuqe dhe sytë blu nuk është e vështirë të dallohet. Pasi përshëndetemi, gjithçka i përngjan një momenti “deja vu” dhe bisedojmë sikur jemi të njohur prej kohësh. Midis prezantimeve dhe shakave, ajo më tregon sesi ishte takuar me Steven Taylor në një restorant… “Isha me miket e mia, kur më afrohet një burrë dhe më flet. Unë e pashë njëherë dhe vazhdova të porosisja, se e ke parasysh si vishet ai dhe në jetën e përditshme duket pak… i çuditshëm. Steven vazhdonte të më fliste, më bëri disa komplimente, unë thjesht e falënderova dhe ika të ulem me miqtë e mi, kur ata të habitur më thonë sesi nuk e njoha se kush ishte. Normale, kur e mora vesh e përshëndetëm sërish duke i kërkuar falje se nuk e njihja (por dhe nuk më shkoi ndërmend) dhe ai u tregua shumë cool dhe erdhi bëri fotografi me ne.” Kemi kaluar disa rrugë dhe më në fund gjendemi në një prej zonave të mia më të preferuara në Manhatan, në “West Brodway”. Aty gjendet një restorant i vogël me ushqim nga Aruba, të cilin e kam fiksim, vetëm sepse ka një dritare me një tavolinë buzë rrugës që të duket sikur je pranë plazhit. Porosisim pije, të rekomanduara nga kamarieri dhe e para dhe e fundit herë që e dëgjoj, Mojito me një kile mint brenda sa po më dukej sikur isha duke ngrënë bar hahaha.

Biseda kalon nga një temë në tjetrën. Alba ka një bukuri ekzotike, e cila shpjegon më së miri dhe faktin pse imazhi i saj së fundmi po kërkohet shumë për punimet print. Në Amerikë, ku tregu blerës është i përbërë prej një shumëllojshmërie etnish, shndërrimi i imazhit është shumë i rëndësishëm për një modele dhe Alba e realizon më së miri këtë, pasi imazhi i saj ka nuanca latineaziatike- mesdhetare një përzierje që mbizotëron jo vetëm tregun amerikan, por dhe atë botëror. “Duket pak qesharake ose e dëgjuar, por në të vërtetë ofertat e para për modelim i kam marrë nga agjentë që më ndalonin në rrugë dhe më jepnin kartën e biznesit e më ftonin për prova e sesione fotografike. Asnjëherë nuk iu kam kushtuar rëndësi, pasi më dukej e çuditshme kjo mënyrë kontakti, por dhe … nuk di, nuk ndihesha rehat.” Tashmë ajo menaxhohet nga “BAE Group”, dhe ka realizuar shumë projekte si në print dhe në video, ndërsa shumë shpejt mund ta shikoni dhe në reklamat e “Dorritos”, “Patron Tequila”, “Ed Hardy Swimmwear” etj. Veç në këtë biznes, bukuria dhe talenti nuk janë gjithçka. “Duhet të kesh dhe fat! Para pak kohësh unë humba rastin të modeloj për firmën kozmetike “Maybelline”. Isha me pushime me familjen dhe nuk e kisha vënë re që menaxheri më kishte marrë në telefon tërë ditës. Më vonë mora vesh se më kishin kërkuar për një reklamë dhe duhej të paraqitesha menjëherë…

U mërzita shumë,sepse …flitet për “Maybelline”, shanse të tilla nuk vijnë shpesh.” I them se nuk ka pse të mërzitet, pasi është ende në fillime dhe jam i sigurt që në të ardhmen do të ketë rastin të punoj me shumë kompani e dizajnë të njohur. Si për të vërtetuar fjalët e mia, dy ditë pas takimit tonë Alba më dërgon një mesazh “OZM! Nënshkrova kontratë me firmën e xhinseve LEVI’S për reklamën e tyre!”. E kështu së bashku, kemi dëshmuar, hapin e parë të madh drejt suksesit, të Alba Meçaj.  Përgatiti: Elbino Sh2