Agron Llakaj largohet nga “Portokalli”

Braktis Top-Channel për Klan-in, në janar shfaqet me “Kush do të bëhet milioner”

Nëse thua Portokalli, imazhi i parë që të vjen në mendje është Agron Llakaj dhe nëse thua Agron Llakaj mendja të shkon në “Portokalli”. Por ky përfytyrim i yni do të marrë shumë shpejt një tjetër drejtim. Nuk është aspak një shaka e hidhur. Aktori i mirënjohur, Llakaj, të cilit pak muaj më parë edhe iu dha urdhri “Mjeshtër i Madh”, nga presidenti Bamir Topi, nuk do të shfaqet më në ekranin e kabaresë së mirënjohur “Portokalli”. Do të zhvendoset në një tjetër televizion, me një sipërmarrje të re, mjaft interesante e njëherazi mjaft joshëse. “Kush do të bëhet milioner”, do të jetë spektakli i ri televiziv që do të nisë në mes të muajit janar 2011 në ekranin e Televizionit Klan, dhe që do të drejtohet pikërisht nga Agron Llakaj. Zërat kanë kohë që qarkullojnë në ambientet e televizionit top-channel. Megjithatë, askush nuk e thotë me zë të plotë këtë gjë.

Thashethemet

Katër vjet më parë në ambientet e televizioneve u fol për një largim të Llakajt, nga Portokalli, por fjalët ikën si era kur në ekran, spektakli më i parë i humorit, erdhi pikërisht nën drejtimin e Agron LLakajt. Por nëse në atë kohë gjithçka u rikthye në vendin e vet, kur Llakaj u shfaq në spektakël, këtë herë nuk ka më kthim pas. Llakaj ka vënë në dijeni drejtuesit e televizionit dhe kontrata e tij me të përfundon në fund të vitit 2010. Nuk dihet nëse Agron Llakaj do të shihet në spektaklin e ndërrimit të viteve, por gjithsesi tashmë është mëse e sigurt që në fund të këtij viti ndërpritet marrëdhënia e tij me spektaklin “Portokalli”. Herë pas here nga “Portokalli” janë larguar aktorë, janë rikthyer të tjerë, një pjesë shfaqen në programe konkurrente, e megjithatë faktin se një ditë do të largohej edhe Agron Llakaj nuk mund ta besonte njeri.

Pasi, duam apo nuk duam ta pranojmë, Goni është shtylla mbajtëse e atij programi. Përveç faktit që përpos moderimit ai luan disa role, e madje shkruan dhe tekste. Në fakt janë plot shtatë vjet që Agron Llakaj dhe Portokalli kanë qenë të pandashëm në mendjen e gjithsecilit, dhe vetë Llakaj në shumë intervista e ka pohuar si një dashuri të madhe të tij. Por ja që edhe për Llakajn ka ardhur koha të vërë në jetë sloganin e Partisë Demokratike “Koha për ndryshim”! Fillim viti 2011 do ta presë Gonin në studiot e TV Klan, ku ai do të nisë provat për datën e parë që do të jetë në mes të muajit janar dhe pikërisht, më 17 janar, ditën e hënë, në orën 21:00. Po si lindi ideja e “Kush do të bëhet milioner?”

“Kush do të bëhet milioner?”

Show është një format që prej disa vitesh transmetohet në televizionin “Alsat” në Maqedoni dhe që ka në qendër një lojë të bazuar në formatin origjinal britanik e “Who wants to be a millionaire?” Qëllimi kryesor i lojës është që të fitojë 50 000 € duke iu përgjigjur pyetjeve të shumta. Emisioni i parë i këtij show, në Angli nisi në vitin 1998 dhe sot ai transmetohet në 106 shtete, përfshi edhe Shqipërinë, që do ta nisë më 17 janar. Aktori i mirënjohur i humorit Agron Llakaj ka nënshkruar me mbajtësit e patentës një kontratë 5-vjeçare. Ndërsa do të presim vitin e ardhshëm si do të vijë ky show, le të shijojmë humorin e Llakajt në sezonin e tij të fundit në “Portokalli”!

Mapo