Ronela Hajati një Lady Gaga shqiptare?!

Intervista / Nuk jam e dashuruar, për mua nuk është fare çështje private, madje me duket budallallëk, në qoftë se do ta fsheh, do të thotë se ka diçka që nuk shkon aty. Unë jam superbeqare në këto momente, jam në kërkim dhe kam dal për gjah (qesh). Kam gati 6 muaj që jam totalisht vetëm. Dua që kur të kem një njeri afër, të kem një njeri të saktë që të përkushtohet.

Nga ENTELA RESULI

Ronela Hajati nuk është dorëzuar kurrë dhe nuk ka hequr dorë nga ëndrra e saj për t’u bërë një yll, pavarësisht se tani pas shumë vitesh ajo ka rezervat e saj në këtë pikë. Ka filluar të rendë pas programeve televizive për zbulimin e talenteve të reja që 12 vjeç dhe tani kur numrat mund t’i kthejmë mbrapsht dhe ajo është 21, jeta nuk është gjithçka muzikë për të. Këto katër vitet e fundit ia ka kushtuar Juridikut. Në të ardhmen, Hajati e shikon vetën si një specialiste në fushën e ligjit, sigurisht, paralelisht me këngën. Madje, mund të themi se kjo degë edhe e ka rritur disi Ronelën, tashmë nuk vishet më me rroba të zeza dhe të gjëra, por këmisha dhe xhaketat kanë zënë vend në gardërobën e saj. E megjithatë, rebelizmi i ka lënë shenja dhe toni i zërit e përcjell këtë ndjesë. Në një intervistë për “Sh2″-in, Ronela, me sportivitetin që e karakterizon, nuk nguron të flasë për veten.

Ronela kohët e fundit jeni komentuar si një imituese e mirë e Ledi Gagës, është e vërtetë kjo, sipas jush?

Eh, sikur ta imitoja shumë mirë do të ishte. Atë e shajnë pa fund, e lavdërojnë pa fund dhe mbetet sërish ikonë. Ndoshta do të ketë rastisur ngaqë bëra flokët bionde. Mua më pëlqen stili i asaj, i ekstravagancës, i budallaqeve pa hesap që bën ajo, por unë nuk bëj të njëjtat gjëra. Unë mundohem të bëj ato që ajo ende nuk i ka bërë, që do të thotë që nuk janë kopje 100 për qind.

Frymëzoheni ju nga ajo?

Po, normalisht. Frymëzohem në sensin që ajo ato çka paraqet në skenë i shohin të gjithë. Nuk mund të them që Ledi Gaga është një nga artistet e mia të preferuara, më pëlqen vetëm stili dhe performanca e saj, ndërsa zëri jo.

Këtë vit ju kemi parë si konkurrente në “Kënga Magjike”. Je një pjesëmarrëse e rregullt e festivaleve?

Te “Kënga Magjike” është hera e tretë. Kam qenë edhe në “Top Fest” vitin e kaluar, mendoj se më ka ecur mirë, nuk kam dalë asnjëherë e zhgënjyer nga festivalet, pasi ka qenë e vetmja mënyrë që deri më tani janë lançuar këngët e mia. Tani do të filloj të nxjerr klipe. Unë kam zgjedhur festivalet se këtë mundësi kam pas. Kam menduar që mos ta paraqes veten time si të gjithë, por që të kalojë njëherë nga kompeticionet ku kam filluar që e vogël, në të kënduarit live dhe më vonë me klipet.

E ndjeni veten që jeni rritur profesionalisht në këtë rrugë?

Unë kam dalë që 12 vjeç në ekran. Kam qenë gjithandej ku bëheshin konkurrime për talentet e reja. Isha e fiksuar me ato ëndrrat që këto realiti-shou do të më bënin një “Super Mega Star” që tani nuk e ka shansin njeri të bëhet në Shqipëri i tillë. Kjo dëshirë e madhe për të arritur për t’u bërë diçka, m’u kthye në shkollë, sepse ishin të gjitha drejtpërdrejtë dhe zgjasnin pothuajse një vit, e normalisht profesionalizohesh me kalimin e kohës, sepse edhe një gur ta marrësh ta gdhendësh përditë e bën skulpturë e jo më dikë që e ka një shkëndijë dhe disa të dhëna.

Jeni bërë një “Star” tashmë?

Jo, asnjë s’ka për t’u bërë “Star” këtu, mendoj se jam kthyer në një njeri që di të këndoj. Kjo sepse mund të ketë shumë këngëtarë që kanë klipe pa fund, këngë gjithashtu, por i sheh në kafe me çdo njeri. Të jesh një VIP, duhet të jesh gati i paprekshëm, njerëzit të të shohin vetëm në spektakle apo koncerte, kjo është, këtu nuk bëhet njëri, Shqipëria 3 milionë veta është.

Në skenë dukeni shumë ekspresive, jeni kështu edhe në jetën e përditshme?

Unë jam njeri i shkathët deri diku, në sensin që, jam e dashur, kam shoqëri, por që shoqëri të ngushtë kam shumë pak. Nuk jam absolutisht njeri i sherreve, i zënkave apo i debateve, mundohem të jem sa më e thjeshtë, pavarësisht se në skenë duket e kundërta totalisht. Ngjaj njeriu më mendjemadh në botë. Në fund të fundit kamera të shet. Ato tre minuta ti je në rol, je në aktrim dhe domosdo ti aty do të dalësh nga vetja, sepse mua më pëlqejnë këngët ritmike, nuk jam shumë për baladat, sepse dua që atë shitje mendjesh që unë nuk e kam përditë, dua ta kem në ato tre minuta në skenë.

Kemi lexuar në shtyp që ju mund të ishit e dashura e Florit, sa e vërtetë është?

Asnjëherë, unë Florin e kam mik prej vitesh, e njoh. Florin e vlerësoj shumë, kam respekt, është një nga kompozitorët më të mirë, po nuk kam lidhje fare me këto thashetheme.

E shikoni muzikën si një profesion që ju sjell të ardhura?

Varet se si të ecën fati, se të ardhurat e vetme që merr këngëtari janë nga koncertet. Kështu që i bie, sa klipe ke, aq më shumë paguhesh. Por, të bësh sa më shumë klipe dhe hite, i thonë të investosh në fillim lek pa fund, sepse kushton shumë.

Jeni ju një vajzë e pavarur dhe me “portofolin” tuaj?

Po, jam, pavarësisht se unë i harxhoj dhe po ta mbaj pak dorën, jam goxha, dhe më del një rrogë shumë e mirë gjatë muajit. Unë harxhoj shumë, vetëm kur e shoh vetën me një 500 lekësh në xhep.

Do të bënit kompromise me komercialitetin?

Sot kapitalizëm, çdo njeri është i lirë të bëjë çfarë të dojë, ka ik koha e censurës dhe e komunizmit.

Cila është periudha më me fat për ju?

Unë duhet të punoj shumë që të arrij një gjë, nuk është se më bien gjërat nga qielli.

Jeni e dashuruar?

Jo, nuk jam. Për mua nuk është fare çështje private, madje me duket budallallëk, në qoftë se do ta fsheh, do të thotë se ka diçka që nuk shkon aty. Unë jam superbeqare në këto momente, jam në kërkim dhe kam dal për gjah (qesh). Kam gati 6 muaj që jam totalisht vetëm. Dua që kur të kem një njeri afër, të kem një njeri të saktë që të përkushtohet.

Sh2