Çiljeta: “Surprizat e mia, pamje të re dhe partner të ri”

Çiljeta: “Surprizat e mia, pamje të re dhe partner të ri”

Fakti që i ka munguar ekraneve me një klip të ri (ka vetëm tre të tillë) nuk tregon se Çiljeta nuk po punon për të sjellë këngë dhe klipe të reja në repertorin e saj, aq më tepër që ajo e di mirë se duke qenë në qendër të vëmendjes dhe shumë e kërkuar, e ka këtë detyrim karshi publikut dhe fansave që e pëlqejnë. Ka preferuar të mos i ndahet bashkëpunimit me Flori Mumajesin, kantautorin e njohur dhe djalin që ka sjellë një frymë shumë rinore në muzikë. Në fillim një baladë e më pas një këngë shumë ritmike të firmosura nga Flori, duket se do të pasohen nga dy krijime të reja, të cilat do të vijnë nën interpretimin e Çiljeta Xhilagës. Këngëtarja ka mbaruar regjistrimin e këngëve, të cilat janë të rrymës R&B dhe po përgatitet për klipet, që do t’i realizojë në Kosovë së bashku me një set të ri fotografish. Në këngën e parë Çiljeta do të bashkëpunojë me Big Bastën, ku ky i fundit njihet tashmë si i preferuar i Florit dhe gjithashtu i preferuari i shumë këngëtareve të reja, për faktin se ka futur një lloj tendence të re në muzikën e lehtë. Në klipin e kësaj kënge, Çiljeta do të paraqitet me të njëjtin pamje me flokë të shkurtra dhe ngjyrë platini. Ndërsa në klipin e dytë do të bëjë një ndryshim rrënjësor, pasi do t’i bëjë flokët pis të zeza. Çiljeta tregon se edhe pamja e re me siguri do të pëlqehet shumë, madje ajo ka shumë nostalgji për flokët e zeza dhe të prera shkurt, pasi në verë kur nxihet ngjan shumë mirë. Një fakt tjetër që e bën Çiljetën t’i rikthehet asaj pamje është se pikërisht me flokë të shkurtra dhe të zeza ajo ka njohur Romeon dhe ai e ka pëlqyer me atë model, kështu jo vetëm bën një ndryshim për qejfin e saj, por me siguri do t’i bëjë një surprizë edhe djaloshit me të cilin është e dashuruar dhe e fejuar.