Titulli i takon Milanit?

Milani ka dalë fitues i derbit të javës së 31-të në Kampionatin
italian, duke mposhtur me rezultat 3-0 rivalin lokal dhe sfiduesin
kryesor për Scudetto këtë edicion, Interin.Derbi della
Madonnina ishte ndeshja kryesore e sezonit, jo vetëm për shkak të
rivalitetit të përjetshëm të dy skuadrave, por edhe për faktin se ato
gjendeshin në krye të tabelës me vetëm dy pikë diferencë në garën për
titullin e Serie A këtë sezon.
Rossonerët patën një start eksploziv. Porsa filloi takimi (1’),
Gattuso pasoi te Robinho, Cesar mbrojti, por aty ishte Alexandro Pato, i
cili reagoi shpejtë për të ngritur në këmbë tifozët në San Siro.
Në fraksionin e parë të lojës edhe Interi pati rastet e veta, mirëpo
nuk arriti të shënojë. Nga rastet tjera në këtë gjysmëlojë, përmendim
goditjen e shtyllës nga Van Bommel, intervenimin bravuroz të Abbiatit në
goditjen e Pazzinit, dhe huqjen e sezonit nga Samuel Eto’o.
Në gjysmën e dytë gjerat u përkeqësuan për zikaltrit, pasi Christian
Chivu u përjashtua me karton të kuq (54’) për shkak të ndërhyrjes në
Alexandro Paton, i cili shkonte drejt golit.
Nuk kaloi shumë kohë pas largimit të rumunit dhe Ignazio Abate
asistoi te Pato, ndërsa braziliani në mënyrë të shkëlqyer e plasoi topin
në rrjet me kokë, për të dyfishuar avantazhin (62’).
Rezultatin përfundimtar të takimit e vendosi Antonio Cassano, i cili
shënoi në minutat shtesë nga pika e bardhë. Sulmuesi italian u inkuadrua
në dhjetë minutat e fundit të ndeshjes, nxori një penallti, shënoi dhe u
përjashtua me karton të kuq.
Pas derbit, Milani ka pesë pikë diferencë nga Interi, kur kanë mbetur
edhe shtatë javë për t’u zhvilluar. Ndërkohë, Nerazzurët mund ta humbin
edhe pozitën e dytë në tabelë, nëse Napoli të dielën mposht Lazion.
/Telegrafi/