Kuzhe në qiellin e shtatë

Kuzhe në qiellin e shtatë







Ai i shënuar në Serinë A ishte qershia mbi tortë. Erjon Bogdani ishte
pemëtari që e prodhoi këtë qershi, një gol prej bilardisti, siç e
komentoi "La Gazeta delo Sport", ndërsa ndiqte direkt ndeshjen
Cesena-Bari.


Tri pikë për bardhezinjtë, më shumë shpresë për të mbijetuar, por
edhe më shumë gëzim për tifozët kuqezinj dhe trajnerin e Shqipërisë,
Josip Kuzhe. Tashmë, janë 39 gola në Serinë A për Erionin dhe 73
gjithsej në Itali, ku fiton jetesën e tij, madje më shumë se kaq, që nga
viti 2000.


Trajneri i kombëtares shqiptare për mediat kroate deklaroi: "Jam i
kënaqur me formën e sulmuesve të mi. Shpresoj se do të vazhdojnë të
shënojnë gola për klubet e tyre. Golat e tyre e bën të frikshme
kombëtaren shqiptare përballë kombëtareve tjera".


Fundjava nuk ka qenë vetëm e Bogdanit. Hamdi Salihi shënoi një gol
për llogari të Rapidit të Vjenës, natyrisht edhe për llogarinë e tij
personale, që shkoi në 50 gola jubilarë në Austri dhe 15 këtë kampionat,
duke qenë shënuesi i dytë më i mirë i Bundesligës vendase.


Përveç dy sulmuesve kryesorë, emrin në listën e shënuesve e shënoi
edhe Ledian Memushaj, mesfushori i Portogruaros, që shënoi një gol
barazimi për skuadrën e tij ku ndodhet i huazuar nga Chievo e Veronës.
Shqiptari hyri në lojë në pjesën e dytë dhe shënoi vetëm 3 minuta më
vonë, duke barazuar rezultatin, por një barazim që nuk bëri punë, pasi
Portogruaro u mund 1-2 në fushën e vet nga Triestina dhe rrezikon të
bjerë në kategorinë e tretë.


Tre gola në një fundjavë të vetme nga lojtarët e saj nuk është një
bilanc i paktë për një kombëtare si Shqipëria, ndonëse tashmë mund të
mburret se i përket 50-es së parë të botës. Trajneri Kuzhe besohet se po
i fërkon duart me kënaqësi për formën e treguar nga futbollistët e
ekipit të tij.