Ja si do të jetë "Eagle Arena"

Ja si do të jetë "Eagle Arena"








"Qemal Stafa", i vetmi stadium kombëtar në vend, do të prishet në fund
të shtatorit dhe në vend të tij do të ndërtohet impianti i ri në kuadër
të festimeve për 100-vjetorin e shpalljes së pavarësisë.


Siç raportoi dje sportnet.al kanë filluar të qarkullojnë zëra
sipas të cilëve stadiumi i ri do të quhet "Eagle Arena" (Arena e
Shqiponjave). Ky emër duket se ka pëlqimin edhe të zyrtarëve të
Federatës Shqiptare të Futbollit.


Megjithatë si do të jetë ky stadium, i projektuar nga studio
spanjolle RFA. Së pari, vlen të theksohet që projekti ka marrë tashmë
miratimin, dhe do të ndërtohet në një sipërfaqe prej 41500 metrash
katrorë, me një kapacitet prej mbi 33 mijë vendesh.


75 për qind e ndenjëseve do të jenë të mbuluara, ndërkohë që janë parashikuar edhe 330 vende parkimi.


Impianti modern do të jetë i ndarë në dy pjesë. Pjesa e poshtme do
të ketë mbi 17 mijë vende, ku përfshihen 525 vende VIP, ndërsa e
sipërmja do të ketë mbi 16 mijë vende, me 320 vende VIP.


Vetëm pak kohë më parë, kryeministri Sali Berisha në një mbledhje të
Qeverie bëri të ditur se stadiumi i ri do të emërtohet "Kuq e Zi". Por,
duket se "Arena e Shqiponjave" u vjen më shumë përshtat tifozëve të
shumtë të Kombëtares sonë.