Angjelina Hadergjonaj, tashmë kolege dhe rivale me mamin…

Vajza e Albërie Hadërgjonajt tërheq vëmendjen e tregut muzikor dhe sot është “konkurrente” me të ëmën. 18-vjeçarja rrëfen pasionin për muzikën dhe arkitekturën.

Ajo u rrit. Tashmë konkurron me nënën e saj në fushën e muzikës, po flasim për Angjelina Hadërgjonajn, vajzën e Albëries. Menjëherë sa po ka dalë në tregun muzikor ka tërhequr vëmendjen e publikut me këngët dhe pamjen e saj. E nuk kishte se si të ndodhte ndryshe me një nënë këngëtare dhe mjaft aktive në muzikë. Pasioni për muzikën e ka bërë që të nxjerrë shumë shpejt një këngë të veten edhe pse më parë ka kënduar e ka marrë pjesë në konkurse të ndryshme për talentet e reja. Një mbështetje shumë e madhe për të është edhe e ëma, e cila e ka bërë vetë më parë këtë rrugë dhe tani është një udhërrëfyes shumë e mirë e vajzës së saj 18-vjeçare. Për Angjelinën, muzika është një pasion së cilës nuk mund t’i shpëtonte dhe do të vazhdojë të jetë i tillë, ndërsa si profesion vajza ka ndërmend të studiojë arkitekturë. Në këtë intervistë, ajo tregon për marrëdhënien më të ëmën, jo si nënë, por si këngëtare me këngëtare dhe mbështetjen e babait dhe lidhjen e veçantë që ka me të.

Angjelina si ndiheni që jeni vajza e Albërie Hadërgjonajt?

Ndihem, një fëmijë i lumtur dhe një femër me fat.

Sa ju ka ndihmuar emri i mamit tuaj në fillimin e karrierës suaj muzikore?

Emri i mamit më ka ndihmuar shumë dhe përherë do të qëndrojë paralel suksesit tim. Sa këngë keni realizuar deri më tani? Kënga “Kopje pa kuptim” ishte kënga ime e parë e realizuar edhe me videoklip, por kam kënduar edhe një duet me mamin, i cili nuk ka klip dhe është realizuar para shumë vitesh.

Kush ka punuar për këngët tuaja?

Kënga është realizuar nga Enis Presheva dhe teksti nga Big Basta, të cilët i falënderoj për bashkëpunimin frytdhënës.

Ju e keni menduar që do të bëheshit këngëtare?

Sigurisht që e kam menduar dhe s’kishte si të ndodhte ndryshe, me një nënë artiste, çdokush është më pranë artit dhe prirjeve për të “rrëmbyer” një profesion që deri diku e ke njohur që fëmijë.

Ju vjen mirë apo keq kur ju thonë ‘e bija e Albëries’, do të donit të mirë të krijonit një profil tuajin?

Ne kemi secila profilin personal, pasi jemi dy individë të ndryshëm që këndojmë rryma të ndryshme, por sigurisht ndihem e lumtur kur përmendet me shumë dashuri që jam e bija e Albëries.

Kush e ka spikatur talentin tuaj në muzikë dhe ju ka thënë që ju mund të jeni një këngëtare shumë e mirë?

Mami im, sigurisht, dhe ajo ka qenë shtysa ime kryesore që u shoqërua më vonë edhe me dëshirën time.

Në çfarë moshe keni filluar të këndoni?

Kam filluar të praktikoj vokalica dhe ushtrime për zërin që në moshën 8-vjeçare e më pas dalja ime e parë ka qenë tek “Gjeniu i vogël” në moshën 10-vjeçare.

Do të jetë muzika profesioni juaj i vetëm?

Muzika nuk do të jetë profesioni im i vetëm, muzika është arti im, profesion do të jetë arkitektura, për të cilën kam shumë dëshirë të studioj.

Angjelina, ju jeni vetëm 18 vjeç, ku do të donit të arrinit në karrierën tuaj?

Dua t’i ngjis shkallet gradualisht dhe të shijoj çdo hap pozitiv në karrierë, por tani është shumë shpejt për të folur.

Përveç muzikës, me çfarë preferoni të merreni tjetër?

Nuk është se aktualisht kam shumë hapësira për t’ju dedikuar shumë gjërave njëkohësisht, pasi sivjet jam e vitin e fundit të gjimnazit që do të thotë se impenjimet dhe dëshirat e tjera kalojnë në plan të dytë.

Sa ju ka ndihmuar pamja juaj… mendoni se është e rëndësishme?

Pamja të prezanton, është e rëndësishme, por një sjellje e bukur e zbukuron njeriun.

Kujt i keni ngjarë më shumë, mamit apo babit?

Unë kam marrë më të mirat e të dyve.

Mami juaj është aktive në muzikë edhe ajo bën këngë e videoklipe, jeni ju “xheloze” për njëra-tjetrën?

Ne e adhurojmë njëra-tjetrën, sidomos për faktin se tashmë jemi të dyja kolege.

I jepni këshilla njëra-tjetrës… për çfarë ju kritikon më tepër mami?

Po, po, shumë këshilla, shumë kritika, për çdo gjë, dhe mendoj se kjo është një gjë e mirë, na ndihmon të dyjave në krijimin e një profili sa më të mirë.

Po ju asaj, çfarë i sugjeroni?

Përgjithësisht, unë kujdesem për look-un e mamit, duke i sugjeruar gjëra të reja, por pa i ndërhyrë asaj në shije.

Kemi folur deri më tani për mamin, pasi ajo është pjesë e muzikës, po me babin çfarë marrëdhënie keni?

Kam marrëdhënie shumë të mira, unë të dy prindërit i kam të rinj në moshë dhe kjo do të thotë shumë.

Sa ju ka ndihmuar apo mbështetur ai në rrugën tuaj?

Ai është përherë ndihmë edhe mbështetje me po aq përkushtim sa mami.

Ka qenë dakord ai me zgjidhjen tuaj për të kënduar dhe për të qenë pjesë e tregut muzikor?

Babi im ka qenë një plus për përkrahjen time, pasi përherë më ka dhënë kurajë, duke më mbështetur e duke më treguar se unë kam talent, por duhet të punoj shumë për të arritur më të mirën.

Mami juaj është me origjinë nga Kosova, ju shkoni në Kosovë, jeni e njohur atje?

Po, ne shkojmë shumë shpesh në Kosovë dhe sigurisht edhe atje më njohin, edhe prej mamit dihet.

Do të keni ndonjë bashkëpunim nënë e bijë?

Ne jemi çdo ditë në bashkëpunim, vetëm se mami është në prapaskenë. Po, po, sigurisht që do të kemi.

Dimë që ju nuk keni një telefon celular si shumica e bashkëmoshatarëve tuaj, pse?

Momentalisht, nuk e ndjej shumë të domosdoshëm për shkak të angazhimeve shkollore dhe aktivitetit muzikor, por, përgjigjet mami për telefonatat e mia.

E keni menduar muzikën si një mundësi për tu bërë e pasur?

Nuk e kam menduar, e kam nisur me dashuri këtë rrugë…

Po me motrën tjetër si i keni marrëdhëniet?

Duke qenë se jemi afër në moshë me njëra-tjetrën jemi si shoqe, jemi kudo bashkë.

Dihet që motrat grinden, për çfarë grindeni më shpesh?

Më shpesh ose përditë zihemi për rrobat, çantat, gjëra të zakonshme.

Kanë filluar ngacmimet e djemve, cila është batuta më e bukur që ju kanë thënë ndonjëherë në rrugë apo në ndonjë vend tjetër?

Ndodh shpesh (qesh), nuk është se kam fiksuar ndonjë.

ENTELA RESULI Gazeta Shekulli