Teuta Kurti: Nuk “vrapoj” pas çmimeve

Këngëtarja Teuta Kurti është prezantuar në festivalin “Kënga Magjike 2010” me një këngë më ndryshe se herëve të tjera. Teuta shprehet mjaft e kënaqur me këngën dhe paraqitjen gjatë emisionit “E diela shqiptare” aty ku bëhen prezantimet e këngëve para shkualifikimit për netët finale të festivalit.

Arben Gjinaj

“Kënga është më ndryshe, është shumë ritmike dhe unë jam shumë e lumtur me reagimet e para që kam marr për këtë këngë si nga ana e publikut në sallë ashtu edhe nga kritikët e muzikës”, thotë Teuta për “Zërin”. Kënga më titull “Mos pi mo” me tekst të Aida Barakut dhe më muzikë nga Florent Boshnjaku ka për mesazh që të mos teprohet në pirjen e alkoolit.

“Bashkëpunimi me Aida Barakun nuk është i rastësishëm. Unë kam punuar edhe më herët më Aidën dhe më pëlqen se si ajo i prek disa tema për të cilat i hasim çdo ditë në përditshmëri por rrallë flitet për to. Teksti bën fjalë se si djali i thotë vajzës që të mos pijë më alkool, ngase pirja e tepruar nuk i dërgon askund”, shpjegon Kurti fabulën e këngës, duke shtuar se vetë ajo nuk është shumë dashamirëse e alkoolit, por ndonjëherë edhe e pi me shoqëri. “Kur jam më shoqëri e përdor ndonjëherë por pa e tepruar. Më pëlqen vëra e bardhë, por asnjëherë nuk i pi më shumë se dy gota” , shprehet këngëtarja për gazetën.

Për Teutën, pjesëmarrja nëpër festivale nuk paraqet domosdo marrjen e ndonjë çmimi, por ajo thotë se e rëndësishme për të është që kënga të promovohet sa më mirë dhe të pëlqehet nga publiku.

“Festivalet e promovojnë punën e këngëtarit, i cili mundohet të punojë gjatë tërë vitit për atë këngë. Dhe, këtë më së miri e bën “Kënga Magjike”, e cila ia jep mundësinë artistit që punën e tij ta përcjellë shumë mirë të publiku. Unë nuk jam tip që ‘vrapoj’ pas çmimeve, për mua është e rëndësishme që kënga të mirëpritet nga audienca”, bën më dije këngëtarja Kurti, duke treguar se nuk ka ndonjë ambicie për çmime kryesore.

Martesa, jo edhe shumë larg

Siç dihet, këngëtarja Kurti tash e disa vite është në lidhje por edhe e fejuar me dizajnerin Dardan Lutën. Teuta ka pohuar se që të dy janë duke kryer magjistraturën, por sipas saj, në planet e tyre është edhe martesa.

“Unë jam në vitin e dytë të magjistraturës për kanto, ndërsa Dardani është duke përgatitur temën e diplomës së magjistraturës për dizajnë grafik. Ne jemi të lumtur për lidhjen dhe dashurinë që e kemi për njëri-tjetrin por patjetër se në planet tona është edhe martesa të cilën po shpresojmë ta bëjmë diku në fund të këtij viti apo në fillim të vitit të ardhshëm. Megjithatë, ne nuk jemi tipa që do të bëjmë ndonjë dasmë të madhe. Ashtu sikurse fejesa mendojmë që edhe martesën ta bëjmë me një rreth të ngushtë të familjes sime dhe të Dardanit”, thotë në fund Teuta Kurti.