Ardi Asllani, artisti perfekt i stilimit

Emri i tij lakohet shpesh, për të mos thënë në çdo show apo spektakël si brenda ashtu dhe jashtë Shqipërisë. Ai është Ardi Asllani, një ndër stilistët më të njohur në Shqipëri. Në një intervistë për “Albania Weekend” ai rrëfen hapat e karrierës së tij që në moshë të re. “Kulminacionin dhe pikënisjen e kisha në vitin 1995 në një konkurs kombëtar i organizuar nga ISPL ku për çudinë e të gjithëve u vlerësova me çmimin e parë dhe pse më i riu i konkursit, vetëm 17 vjeç. Më pas vijuan në vitet 1996 deri në vitet 2000 shumë prezantime dhe çmime ndërkombëtar në Itali (vend ku mora dhe formimin bazë) dhe pas viteve 2000 sërish në Itali, Athinë, Gjermani, Beograd, Sarajevë, Londër etj. Kështu nisi kjo rrugë që nëse bëj të kthej kokën pas më duket si një jetë e jetuar ndërmjet Sfilatash, Biennale-sh, Operash, Baletesh, Musikal-esh, Teatrosh, Filmash Artistikë, Spektakle dhe Show Televizive pra jam munduar që ti prek nga pak të gjitha performancat e artit skenik dhe televiziv me kostumet e krijuara nga unë dhe kjo ka qenë një zgjedhje jo e rastësishme por një kërkesë ndaj vetes për të arritur një pjekje profesionale”- pohon Asllani. Emri i tij shpesh herë është përzgjedhur mes stilistëve të ndryshëm nga e gjithë bota. Pjesëmarrja nëpër evente të ndryshme është tepër pozitive pasi përcjell vlerat e vendit tonë në një fushë shumë të kërkuar dhe të lakmuar vitet e fundit siç është moda, por me pak profesionistë të vërtetë.

Kush është Ardi Asllani për atë që se njohin?

Ardi Asllani tashmë është një djalë 32-vjeçar në kërkim të një maturimi profesional i cili po vjen me vitet në të cilat ushtron profesionin e stilistit. Zgjedhje kjo që në vitet e adoleshencës së hershme dhe që prej asaj kohe vazhdon të jetë kolona zanore e jetës së tij. (Nuk besoj që mund të them më shumë për veten).

Me çfarë po merresh momentalisht?

Aktualisht punoj si Drejtor Estetik në një prej kompanive më të mëdha mediatike në vend “Media Vizion” dhe sapo kam dalë nga Spektakli “Miss e Mister Albania 2010” në të cilin mbaja autorësinë e kostumeve ndërsa shfaqja që kam në dorë këto ditë është “Dhimbje dhe dashuri” e cila premierën e saj e ka sonte në TOB, një balet i konceptuar nga autorët e tij Enada e Gerd Vaso (që janë dhe koreografët e kësaj shfaqje) mbi jetën e kompozitorit të madh Shopin.

Si ka nisur rruga drejt stilimit?

E ceka pak më lart që daton herët por kulminacionin dhe pikënisjen e vet e kisha në vitin 1995 në një konkurs kombëtar i organizuar nga ISPL ku për çudinë e të gjithëve u vlerësova me çmimin e parë dhe pse më i riu i konkursit, vetëm 17 vjeç. Më pas vijuan në vitet 1996 deri në vitet 2000 shumë prezantime dhe çmime ndërkombëtar në Itali (vend ku mora dhe formimin bazë) dhe pas viteve 2000 sërish në Itali, Athinë, Gjermani, Beograd, Sarajevë, Londër etj. Kështu nisi kjo rrugë që nëse bëj të kthej kokën pas më duket si një jetë e jetuar ndërmjet Sfilatash, Biennale-sh, Operash, Baletesh, Musikal-esh, Teatrosh, Filmash Artistikë, Spektakle dhe Show Televizive pra jam munduar që ti prek nga pak të gjitha performancat e artit skenik dhe televiziv me kostumet e krijuara nga unë dhe kjo ka qenë një zgjedhje jo e rastësishme por një kërkesë ndaj vetes për të arritur një pjekje profesionale.

Si e shikoni zhvillimin e modës në Shqipëri?

Është një ndër pyetjet që jo vetëm më bëhet më shpesh por edhe ia drejtoj vetes shpesh. Prej saj marr të njëjtën përgjigje që do ta ndaj dhe me lexuesit tani. Moda përveç të qenurit një art krijues është dhe një biznes industrial i cili do të funksiononte nëse në Shqipëri do të ekzistonte ende Industria Tekstile dhe sigurisht tregu konsumator nuk do të ishte prej 3 milionësh…, por më duhet të pranoj që Shqipëria mund të prodhoj krijues e dizenjues shumë të mirë të modës sepse ne kemi ditur të tregojmë shije dhe dëshirë për të bukurën me shumëllojshmërinë e kostumeve kombëtare.

Dimë që je një ndër kostumografët më të arrirë në shumë spektakle si brenda ashtu dhe jashtë Shqipërisë. Çfarë mund të na thuash më shumë mbi këto eksperienca?

Nuk di ç’të them, gjithçka ka ardhur shumë natyrshëm tek unë, nuk e kam kërkuar me forcë por kam punuar për ta arritur atë. U rrita mes bocelëve të skicave dhe stofrave që prisnin për tu realizuar në veshje dhe për sa i përket eksperiencave janë të shumta sepse deri më tani jeta profesionale ka marrë shumë vend nga jeta ime personale ato janë kombëtare dhe ndërkombëtare, çmime, pjesëmarrje, nisur nga ai djaloshi 17-vjeçar e deri më tani që po të nis ti numëroj ju them sinqerisht do të më duhet kohe ti kujtoj të gjitha sepse si vite vërtet nuk janë shumë por dendësia e aktiviteteve në këto vite ka një ngjeshje të madhe.

Çfarë solli për ju stilimi i pjesëmarrëseve në “Dancing with the stars” në Vizion plus?

Nëse do të thosha ishte spektakli i radhës sigurish do t’iu gënjeja sepse e vërteta është që “Dancing with the stars” ishte prova e afirmimit tim profesional. Krijime dhe realizime që duhet të nisnin të dielën dhe të enjten (dita e show-t) duhet të shihnin dritat e skenës dhe jo pak por ishin qindra kostume të cilat realizoheshin për herë të parë për sa i përket numerologjisë dhe shumëllojshmërisë në Shqipëri, pra “Dancing with the stars” ishte një sfidë profesionale shumë e bukur.



Çfarë do të thotë për ju të jeni një ndër stilistët më të preferuar dhe më të njohur në fushën e modës?

Po ta mendoj mirë e gjithë kjo çfarë thatë më lart tek unë përkthehet me një fjalë “përgjegjësi’ e cila nga spektakli në spektakël rritet dhe shton dozën e frikës për hapin pasardhës që do të hedh sepse mos suksesi për këdo është aty pas dere ndaj duhet maturi në përzgjedhje dhe përgjegjësi në krijimin e një figure artistike sa më të plotë.

Kush janë momentet e mërzitjes për Ardin?

Ka plot të tilla si personale ashtu dhe profesionale por ndryshimi midis tyre është se profesionalet me punë arrin ti korrigjosh dhe ti kthesh në mësim për projektin e radhës por ato personalet dhe mbi të gjitha ato të shkaktuara nga të tjerët janë ato që lenë gjurmë, por të paktën për një gjë duhet të ndihemi mirë sepse koha shëron dhe plagët më të thella dhe sigurisht me to dhe mërzitjet që për karakterin dhe formimin tim personal janë më tepër momentale.

Ku e ndjen veten të dështuar një artist?

Artist uhhhhhhhhhhh sa fjalë e madhe!!! Një këngë e vjetër e Realizmit Socialist thoshte *një minator një mjek apo një bujk i mirë kur profesionin e bën më shumë dëshirë të gjithë njëzëri thonë ky është artist* dhe duke i qëndruar këtij konteksti sa pragmatist por dhe aq jetësor e të vërtetë artisti duhet ta ndjej vetën të dështuar kur thellë brenda tij ka shterur dëshira për të krijuar dhe mendoj që kjo vlen për çdo profesion sepse siç thashë më lart fjala artist është fjalë e madhe dhe tepër e rëndë për supet e një 32-vjeçar.

Cilat janë dobësitë e tua si stilist?

Silueta dhe respektimi i saj në çdo detaj sepse duhet ti jemi mirënjohës krijuesit për formën antropometrike që na dhuroj dhe s’ka pse çdo profesionist të mos i reflektoj asaj përpiktmëri dhe delikatesë! Pra dhe dobësia ime profesionale është silueta mbi të gjitha ajo femërore.

Cilat janë momentet më të vështira, në të cilat jeni ndodhur?

Gjatë këtyre viteve të gjata të punës time kam patur shumë momente të tilla sepse në origjinë nuk jam bir arti dhe gjithçka më është dashur ta kanalizoj vetë dhe kjo ka nisur në moshë shumë të hershme. Rruga për deri këtu nuk ka qenë e lehtë por me sa duket dëshira për të bukurën dhe këmbëngulja bëri që të vazhdoja dhe ndoshta këto momente dhe përballimi me to bëri që ta dashuroj e të lidhem më shumë me profesionin tim.

Po periudha më e bukur e karrierës suaj cila është?

Përditshmëria, realizimi i një veshje… nuk besoj që ka gjë më të bukur se kjo por nuk më duhet ta mohoj, vlerësimet e herë pas hershme të motivojnë për të vazhduar përpara dhe këto momente nuk më kanë munguar. Kam nisur rrugën time me një të tillë, jam vlerësuar disa herë dhe jashtë vendit e për të arritur në çmimin e si veshja më e mirë e “Miss Word 2009” çmim i dhënë mes 120 shtetesh këto pra e shumë të tjera në dukje janë të parëndësishme por me vlera të veçanta formojnë pazellin e jetës së një krijuesi.

Përveç pasionit të stilimit, cilat janë pasionet e tjera të Ardi Asllanit?

Janë shumë… thonë që këndoj mirë dhe këtë e kam provuar dhe në një Show Televiziv ku konkurronin mes tyre njerëz publik dhe kam arritur në treshen finaliste, baleti është dashuria e parë sepse në fëmijërinë e hershme kam frekuentuar klasat e baletit klasik të asokohe, letërsia është një pasion i mëvonshëm, nuk kam provuar të shkruaj por sigurisht që jam një lexues i mirë dhe shumë i rregullt pra të gjitha pasionet kanë lidhje të drejtpërdrejtë me artin.

Cila është taktika e Ardit për të dalë nga situatat e vështira?

Nuk kam taktika të planifikuara ose standarde por di që shpesh herë gjendem pjesë e situatave të vështira pa qenë iniciator me dashje i krijimit të tyre dhe në kësi rastesh veproj sipas momentit dhe pse nuk jam nga ata që i kthej shpinën vështirësive por kërkoj të gjej thelbin e problemit dhe me gjetjen e tij dhe zgjidhja do të jetë më e lehtë.



Si e menaxhoni kohën për familjen dhe për karrierën?

Familja ime dhe pse tepër e vogël në numër ka vendin e vet por herë pas here bëhet pjesë e problemeve, situatave dhe pse jo dhe e kënaqësive të mija profesionale por vitet më kanë mësuar që familja zë pjesën predominuese në jetën e njeriut dhe nëse ke një të tillë të fortë pas vetes aq më i fuqishëm dhe i mbrojtur ndihesh profesionalisht dhe për këtë i jam mirënjohës njerëzve të mi.

Cilat janë planet tuaja për të ardhmen?

Nëse janë plane le të mbeten të tilla sepse kam dëgjuar që nëse planet përfliten nuk gjejnë kurrë dritën e realizimit. Por është diçka që dua ta ndaj me ju, sapo kam marrë një ftesë për pjesëmarrjen në Med Moda 2011 një Show i madh i përvitshëm i organizuar nga RAI ku pjesëmarrësit përzgjidhen nga autorët e programit nga e gjithë bota dhe këtë vit si para disa vitesh është nominuar për pjesëmarrje dhe emri im. Jam akoma në fazat e para të këtij projekti dhe nuk dua të zgjatem më tej.

Albania