Sot demonstrata e opozitës nën masa të rrepta sigurie

Organizatorët e demonstratës bënë të ditur dje, se itinerari i demonstruesve do të jetë i tillë: Stacioni i Trenit-bulevardi "Zogu i parë”, Zogu i Zi-rruga e "Durrësit”, 21 dhjetori-rruga e "Kavajës”, pallati me shigjeta-Unazë dhe filologjiku-rruga e "Elbasanit”.

Do të zhvillohet sot në mesditë demonstrata e paralajmëruar e opozitës së bashkuar shqiptare për të kërkuar rrëzimin e qeverisë dhe zgjedhje të parakohshme.Me sloganin "Berisha dorëzo bllokun” protestuesit, të ardhur dhe në rrethe të ndryshme të vendit, pritet të mbushin bulevardin "Dëshmorët e Kombit” rreth orës 14.00.

Organizatorët e demonstratës bënë të ditur dje, se itinerari i demonstruesve do të jetë i tillë: Stacioni i Trenit-bulevardi "Zogu i parë”, Zogu i Zi-rruga e "Durrësit”, 21 dhjetori-rruga e "Kavajës”, pallati me shigjeta-Unazë dhe filologjiku-rruga e "Elbasanit”. Të gjithë protestuesit, në koordinim me njëri –tjetrin do të krijojnë idenë e lumenjve të gjatë njerëzish që vërshojnë drejt bulevardit qendror, para kryeministrisë, duke demonstruar fuqinë edhe përmes numrit të madh.

Në të gjitha pikat, grumbullimi do të nisë në 13:30, ndërsa në qendër parashikohet që njerëzit të jenë në orën 14:00. Burimet nga opozita thanë dje, se nuk do të ketë as podium dhe as foni, por demonstrues të rastësishëm mund të flasin me megafon, duke bërë thirrje dhe duke dhënë mesazhe kundrejt masës së njerëzve. Edhe fjalimet e krerëve të partive të opozitës nuk do të përjashtohen, por nuk do të jenë të gjata, ashtu siç ndodh në protestat e zakonshme. Fjala sot, do t’i lihet tërësisht popullit, ashtu siç kanë deklaruar edhe kryetari i PS-së dhe drejtues të tjerë të Opozitës së Bashkuar.

Gazeta Shqiptare duke iu referuar shifrave të raportuara nga drejtuesit lokalë të PS në rrethe shkruan sot se rreth 800 automjete e më shumë se 25 mijë persona pritet të "mësyjnë” sot Tiranën. Sipas tyre, këto janë vetëm shifrat që ata kanë në rrugë zyrtare dhe të organizuar, pasi pjesëmarrësit do të jenë dhjetëra herë më shumë.
POLICIA MERR MASA
Një plan konkret masash janë marrë dhe nga policia për të ruajtur rendin gjatë ditës së sotme dhe për të parandaluar çdo akt dhune gjatë demonstratës së opozitës.
GSH shkruan sot se rreth 3500 efektivë policie do të jenë në gadishmëri sot. Përveç sektorëve të hetimit të krimeve, akteve terroriste, punonjësve të policisë së rendit që do të jenë përkrah turmave, policia rrugore do të jetë në gatishmëri thuajse 24-orëshe, e instaluar jo vetëm kryqëzimeve por edhe hyrje-daljeve të Tiranës.

Një sërë rrugësh do të merren në mbrojtje nga policia rrugore. Konkretisht bulevardi, rrugë e "Durrësit”, e "Kavajës”, e "Elbasanit” do të mbikëqyrën në mënyrë të rreptë për të mundësuar qarkullimin normal në Tiranë.Në një njoftim për shtyp, Policia e Tiranës bëri të ditur dje se tubimet sipas itinerarit të njoftuar, do të monitorohen me kamera.

Demonstrata po ndiqet me vëmendje dhe nga nga komuniteti ndërkombetar. Ambasada amerikane në Tiranë lëshoi dje një deklaratë ku ndër të tjera thuhet se mbështet çdo lloj forme proteste të popullit, gjithmonë nëse ato nuk janë të dhunshme dhe respektojnë institucionet.
(s.g/balkanWeb)
Attachments: Image 1