SHKOLLË SHQIPE NË AMERIKË

U hap shkolla e parë shqipe
Në Uster të SHBA-ve

Komuniteti
shqiptar në Uster të SHBA-së, fëmijë dhe prindër, tashmë kanë mundësinë
të ndjeki programe mësimore në një shkollë tërësisht në gjuhën shqipe.
Shkolla e parë shqipe në qytetin e Uster Masaçusets (Worcester –
Massachusetts) të SHBA-ve, u çel në një ceremoni festive paraditen e 3
tetorit, ku ishte e pranishme kryetarja e bashkisë së Usterit me
origjinë shqiptare, Konstantina B. Lukes, drejtuesi i shoqatës “Kombi,
Dhimitër Dishnica, drejtoresha e shkollës së komunitetit "Elm Street"
Mary Kefee, drejtori i shkollës shqipe Leka Bezhani, prindër e anëtarë
të bashkësisë shqiptaro-amerikane.

Hapja e kësaj shkolle, nismë e
shoqatës Atdhetare-Kulturore “Kombi”, u konkretizua me mbështetjen e
strukturave të arsimit vendor në qytetin amerikan si dhe një grupi
profesionistësh të fushës së arsimit mes bashkësisë së emigrantëve
shqiptarë që jetojnë dhe punojnë në Uster.

Pjesëmarrësit në këtë
ceremoni e vunë theksin në rëndësinë e fillimit të këtij programi
edukativ dhe me vlera të trashëgimnisë, që bëhen pjesë e dobishme dhe
vitale për larminë dhe bashkësinë e shumë kulturave të emigrantëve që
bashkëjetojnë në një qytet si Usteri.

Kryetarja e bashkisë së
Usterit, Lukes, në një prononcim e vlerësoi si një nismë mjaft të çmuar
hapjen e shkollës në gjuhën shqipe në qytetin amerikan.

“Do të
dëshiroja që kjo shkollë të ishte edhe atëherë kur unë nisa të mësoja
anglishten. Sot është e rëndësishme që të njohim edhe gjuhë të dyta, por
e mira që vjen me çeljen e shkollës shqipe këtu në Uster është se
fëmijët vijnë bashkë me prindërit. Nuk do të ketë boshllëk mes brezave.
Ndërsa fëmijët plotësohen duke mësuar gjuhën shqipe, prindërit e tyre
ndjekin programe të tjera studimi të vlefshme për jetën e përditshme dhe
integrimin”, tha Lukes, me origjinë shqiptare.

Për drejtorin e
shkollës Leka Bezhanin ky fillim kërkon të mbështetet jo vetëm me
pjesëmarrje, por edhe nga strukturat e shkollës që fëmijët të marrin
njohuri dhe të gjejnë kënaqësi përsa ata do të përfitojnë. Sipas tij,
mësuesit do të paguhen përsa kohë ata japin mësimin. Bezhani u ndal dhe
tek pjesëmarrja e prindërve në këtë shkollë. “Prindërit, gjatë orëve që
fëmijët e tyre studiojnë, do të kenë mundësi që të shkëmbejnë mes tyre
përvojën e profesioneve, të marrin dije në përdorimin e kompjuterit, të
gjejnë sqarime në fushat e ligjit, biznesit, të taksave, lejes së
qarkullimit të automjeteve, si dhe të mjaft aspekteve të tjera të jetës së përditshme”, tha ai.

Drejtori
i shkollës shqipe në Uster vuri në dukje rëndësinë e forcimit kulturor e
financiar të komunitetit shqiptar në SHBA, një zhvillim i domosdoshëm
dhe integrues.

“Shkolla si e tillë na bën t’i kuptojmë edhe më
mirë lidhjet mes kulturës, patriotizmit, interesit dhe zhvillimit
ekonomik të familjeve emigrante shqiptare si dhe përkushtimit për t’u
integruar në jetën e një vendi të madh si SHBA", tha ai.

Shkolla
është konceptuar 3-4 orë çdo të shtunë dhe deri tani janë regjistruar
rreth 50 fëmijë, 13 fëmijë prej të cilëve nga Kosova. Grupi pedagogjik,
prej pesë mësuesish, kanë ndarë ndërkohë nivelet e mësimdhënies nga
fillestarët deri tek më të avancuarit. Struktura e shkollës mbështetet
në programet bashkëkohore të mësimdhënies, sipas standarteve të
Ministrisë së Arsimit të Shqipërisë. Veç mësuesve, ajo ka dhe strukturën
financiare dhe nivelin e drejtimit apo të mbarëvajtjes me drejtorin.
zv/drejtorin dhe ekonomistin.

Megjithse ceremonia e çeljes së
shkollës shqipe në qytetin Uster Masaçusets (Worcester – Massachusetts)
të SHBA-ve, shënoi këtë fund javë hapat e parë të njohjes, klasat dhe
mësimi për fëmijët dhe prindrit do të zhillohen pandërprerë.