Berisha: Nëse PS nuk hyn në Kuvend, mandatet do digjen

Berisha: Nëse PS nuk hyn në Kuvend, mandatet do digjen



Tërhequr më 30 Dhjetor 2009


Kryeministri
kundërshton hapjen e kutive. Për mandatet, sipas tij, do të zbatohet
Kushtetuta TIRANË - Kryeministri Sali Berisha paralajmëroi dje se do të
zbatohet Kushtetuta në rast se deputetët e opozitës nuk do të marrin
pjesë në Kuvend, brenda këtij 6-mujori. Sipas interpretimit që jep
Kryeministri i vendit, Kushtetuta parashikon mbarimin e mandatit në
rast se nuk bëjnë betimin brenda 6 muajsh. Kreu i ekzekutivit theksoi
se vendet në Parlament nuk do të mbeten bosh, por, për të gjithë
deputetët e opozitës që nuk do të hyjnë në Parlament për të bërë
betimin do të zbatohet Kushtetuta. Në një intervistë për "Zërin e
Amerikës", Berisha vuri në dukje se mazhoranca nuk dëshiron një krizë
tjetër kushtetuese, por nëse deputetët e PS-së nuk futen në Kuvend
atyre do t'u digjet mandati katër vjeçar, që praktikisht do të thotë
një shumicë pa opozitë në Parlament. "Unë të garantoj që vendet nuk do
të mbeten bosh, por të garantoj se zbatimi i Kushtetutës është një
detyrim që bëhet me keqardhje, por është detyrim. Nuk kam asnjë
dëshirë. Zoti Rama të vijë. Është i mirëpritur. Por, nuk mund të
krijohet një krizë tjetër kushtetuese për këtë arsye. Jo. Kushtetua do
të zbatohet. Dhe të jem i sinqertë. Në këtë çështje është bërë një
interpretim shumë i gjerë i situatës. Kushtetuta thotë se mandati
humbet kur deputeti nuk bën betimin. Është shumë e qartë, shumë e prerë
dhe është pika e parë kur deputeti humbet mandatin. Rregullorja e
Parlamentit e cila në vetvete është kushtetuta e Parlamentit ajo
përcakton 6 muaj mungesë për t'u paraqitur dhe në këtë rast në opsionin
më posibilist, është pranuar ky variant i dytë për t'u llogaritur. Por
kushtetuta do të zbatohet", - tha dje Berisha. Ndërkaq, lidhur me
krizën politike që ka shkaktuar mungesën e deputetëve në sallën e
Kuvendit, kur opozita kërkon hapjen e kutive, kreu i mazhorancës ka
shprehur sërish qëndrimin e tij se opozita është e mirëpritur për të
përmirësuar sistemin zgjedhor, por kutitë e votimit nuk mund të hapen.
Sipas Berishës, mazhoranca është e gatshme të hetojë gjithçka për
zgjedhjet e Qershorit, por nuk mund të dalë mbi vendimin e gjykatave,
që është dhënë për këto zgjedhje. "Të hetojmë çdo gjë tjetër për këto
zgjedhje, por jo vendimin e gjykatave. Të sjellë të formuluara të
gjitha amendimet për sugjerimet që janë bërë dhe unë ja pranoj siç mi
sjell. Testin zoti Rama duhet t'ia bëjë kësaj mazhorance te reforma, te
ligjet, te debatet, te të gjithë, por testin nuk mund t'ia bëjë, duke i
kërkuar një procedurë, që zgjedh murin e qoshes së ndërtesës. S'mund ta
marr unë atë, s'mund të them unë sot se sot unë mund të diskutoj me
zotin Rama të kapërcej një vendim gjykate", - u shpreh Kryeministri. Ai
shtoi se opozita zhvilloi protesta në të gjithë vendin për një çështje
që është tërësisht antidemokratike, pasi sipas Berishës procedurat
ligjore nuk lejojnë hapjen e kutive të votimit. Për sa i përket rritjes
së çmimit të energjisë, ku opozita ka hedhur edhe akuza të forta në
drejtim të qeverisë duke e bërë përgjegjëse për këtë situatë, Berisha u
justifikua me faktin se ai nuk mund të ndërhyjë për të zgjidhur këtë
problem, pasi ajo është çështje që duhet të zgjidhet mes kompanisë çeke
CEZ dhe kompanisë ERE. Madje, kryeministri i ka qarë hallin vetes, pasi
janë dyfishuar çmimet për institucionet buxhetore. "Tani si janë
problemet mes CEZ dhe ERE nuk ndërhyj, sepse në këtë proces unë shoh
veten time si qeveri më të penalizuarin se janë dyfishuar çmimet për
institucionet buxhetore, janë gjithë ato institucione, shkolla. Në
buxhet dy herë me shumë do shkojnë për energji", - tha ai.
Marrëveshja e ujërave, Berisha: Eksperti është një sharlatan
TIRANË - Kryeministri Sali Berisha nuk ka dhënë dje një përgjigje
konkrete mbi çështjen e marrëveshjes së kufirit ujor midis Shqipërisë
dhe shtetit grek. Ai ka akuzuar ekspertët që e kundërshtuan
marrëveshjen e nënshkruar mes qeverisë shqiptare dhe asaj greke për
delimitimin e ujërave detarë. Pa përmendur emra, por duke lënë të
kuptohet se bëhet fjalë për ekspertin Myslim Pashaj, Berisha tha se
deri më tani nuk është dhënë asnjë fakt për të vërtetuar të kundërtën e
asaj që mbrohet zyrtarisht. "Unë natyrisht e kam ndjekur debatin. Unë
çfarë shoh në debat. Shoh një sharlatan që kalon nga ekrani në ekran
dhe çfarë thotë. Thotë që Gjiri i Sarandës nuk është ai që ai vetë ka
përcaktuar me dorën e vet dhe institutin që ka drejtuar, ka vizatuar
dhe ua ka dhënë shqiptarëve në të gjitha tekstet dhe e ka përcaktuar në
enciklopedinë e Shqipërisë, por gjiri i Sarandës është ai që ka
përcaktuar legjenda. Pra, absolutisht kemi të bëjmë, koncepti im më
falni, me një sharlatan të mirëfilltë që nuk jep as edhe një fakt të
vetëm. Gjykata e Shkupit dhe ajo kushtetuese nuk mori përsipër
trajtimin e kësaj çështjeje. Të njëjtën çështje shtroi edhe atje
opozita. Gjykata e Tiranës e mori përsipër", - tha dje Berisha. Duke
folur në një intervistë për "Zërin e Amerikës", kreu i qeverisë theksoi
se marrëveshja midis Shqipërisë dhe Greqisë është e bazuar edhe në
eksperiencat e vendeve të tjera. Sipas Berishës, të mendosh faktin se
ekspertët shqiptarë kanë shitur territor kjo është pjesë e një mendësie
të vjetër.
"Dakord. Po e ndjekim. Çfarë argumenti do paraqesë pala tjetër. Unë
gjykoj se të gjitha argumentet janë paraqitur për zbatimin me
korrektesë të traktatit të detit. Është përcaktuar ajo si bazë dhe ajo
përdoret si bazë në shumicën e vendeve të botës. Nuk kam as edhe
shqetësimin me të vogël për të. Por të mendoj se ekspertët shqiptarë
shitën territor. Kjo vjen nga mendësia më e vjetër e këtij vendi. Ai
është një proces transparent. Gjiri i Sarandës është gjiri i Sarandës.
Ka një përkufizim enciklopedik, gjeografik, një përkufizim të
gjithanshëm", - shtoi Berisha.
Neni 71 i Kushtetutës 1. Mandati i deputetit fillon ditën që ai
shpallet i zgjedhur nga komisioni përkatës i zgjedhjeve.
2. Mandati i deputetit mbaron ose është i pavlefshëm, sipas rastit:
a) kur ai nuk bën betimin;
b) kur heq dorë nga mandati;
c) kur vërtetohet një nga kushtet e pazgjedhshmërisë ose
papajtueshmërisë të parashikuara në nenet 69, 70 paragrafët 2 dhe 3;
ç) kur mbaron mandati i Kuvendit;
d) kur mungon pa arsye mbi 6 muaj rresht në Kuvend;
dh) kur dënohet me vendim gjyqësor të formës së prerë për kryerjen e
një krimi.