El Sajed, dashuria ime për Shqipërinë

Titulli: El Sajed, dashuria ime për Shqipërinë 09.01.10 5:54


Publikuar me: 08 Qer 2009 Hueyda El Saied tregon eksperiencën e fundit televizive, drejtimin e Festivalit Mbarëkombëtar të Këngës për Fëmijë. Si ka qenë fëmijëria e një vajze me ngjyrë në Shqipëri dhe dashuria me Benjaminin Për herë të parë, Festivali Mbarëkombëtar i Këngës për Fëmijë realizuar në Shkodër, po drejtohet nga një prezantuese ndryshe... Hueyda El Saied ka marrë përsipër të drejtojë këtë festival, i cili realizohet për të 47-tin vit radhazi. Ajo, prej të enjtes është në Shkodër, ndërsa sot përgatitet për natën finale. Të gjithë e mbajnë mend Hueydën 16 vjeçe të kërcente në spektaklet e organizuar në Shqipëri. Ngjyra çokollatë e lëkurës, floku "tmerrësisht" kaçurrel, mënyra e ëmbël e të shprehurit, e bënë atë një nga personazhet më të pëlqyera televizive. Në një intervistë për Sh2-shin, Hueyda, tashmë 34-vjeçare, rrëfen kënaqësinë e të drejtuarit një festival për fëmijë, por jo vetëm. Tregon për daljen e një libri të tretë, por këtë herë në frëngjisht dhe dashurinë e "fortë" që po përjeton me Benjaminin Hueyda, po drejtoni Festivalin Mbarëkombëtar të Këngës për Fëmijë në Shkodër, si ndiheni në këtë pozicion? Është një eksperiencë shumë interesante. Aq më tepër që, kur kam qenë fëmijë, ky festival me ka bërë të ëndërroja. Me pak fjalë, po realizoj në një farë mënyre, një ëndërr të hershme. Çfarë do të thotë të jesh mes fëmijëve? Do të thotë shumë gjëra njëkohësisht dhe ky fakt më vë përballë pafajësisë, çiltërsisë, gjithçkaje që nuk ka fare lidhje me të llogariturit, si dhe jam e gëzuar që disa vite më pas do të kem mundësi të mburrem duke thënë: "Ai vërtet është i suksesshëm dhe i famshëm tani, por unë e kam njohur kur ai këndonte në festivalin e fëmijëve". Kjo eksperiencë dhe qëndrimi mes fëmijëve, a ju kujton moshën tuaj të fëmijërisë, ndjeni nostalgji për atë kohë?Sigurisht, ajo më kujton pasionin e hershëm që unë kam pasur për artin, si fillim violinën dhe më pas për kërcimin. E kush nuk ka nostalgji për fëmijërinë e tij? Si e kujton Hueyda veten të vogël, në kopsht apo në shkollë fillore? Cilët ishin miqtë e saj, si luaje me shoqet? Kam qenë një fëmijë shumë çapkën, por që dija se çfarë doja. Jam unë që vendosa një ditë të studioja për violinë, por jo vetëm kaq, doja të luaja si Paganini, e pastaj e tradhtova violinën, pasi doja të bëhesha si Jozefin Baker, një balerine-këngëtare amerikane. Ndërsa mikesha ime më e mirë ka qenë ime më, e cila më ka inkurajuar gjithnjë në zgjedhjet e mia. Fakti që je një person me ngjyrë, të ka krijuar probleme në moshë të vogël, si të shihnin miqtë e tu bashkëmoshatarë? Ajo që më kujtohet është se kam pasur një fëmijëri shumë të bukur. Kam pasur shumë shokë e shoqe dhe ndryshimi im fizik ka qenë forca ime.Jeni njohur në Shqipëri, por jo vetëm, keni kaluar momente shumë të bukura të karrierës suaj edhe në Francë si balerinë. Keni hequr dorë përfundimisht nga kërcimi?Lë të themi që për momentin më pëlqen më shumë të shoh të tjerët të kërcejnë. Po ku i dihet, ndoshta një ditë dhe mund t'i rikthehem skenës si kërcimtare. Keni qenë për një periudhë kohe prezantuese e emisioneve të ndryshme televizive, çfarë ju ka dhënë kjo eksperiencë? Në emisionet e mia nuk kam qenë vetëm prezantuese, kam shkruar skenarin, si dhe kam bërë producenten. Ka qenë një eksperiencë mjaft e frytshme, pasi më ka dhënë mundësi që të shprehem në forma të ndryshme. A do t'ju shohim sërish me një program dhe format tuajin në ekran? Prej më shumë se një viti e gjysmë jam shpërngulur në Paris, ku vazhdoj karrierën time, po në televizion, por në një pozicion tjetër, atë të aktores së një telenovele. Pjesëmarrja ime si prezantuese në Festivalin e 47-të Mbarëkombëtar të Këngës për Fëmijë, është një përjashtim që bëra, pasi këtu jam përkohësisht dhe për arsye të tjera, që s'kanë asnjë lidhje me artin. Por ishte shumë e vështirë t'i thosha jo një propozimi kaq të bukur, të bërë nga drejtori i këtij festivali, zoti Kujtim Alia dhe skenaristes Manjola Lloja Bushati. Përveç këtyre, jeni autore edhe e dy romaneve. Sa për qind prej Hueyedës ka në ata libra, keni ndonjë libër tjetër në dorë? Të shkruarit është një tjetër pasion i imi. Por nuk shkruaj vetëm autobiografi (qesh), pasi mendoj që ç'ka më pret nesër dhe në ditët në vijim do të jetë më interesante se e djeshmja. Kam mbaruar së shkruari një libër të tretë, këtë radhë në frëngjisht, i cili do të botohet në Francë, në shtator. Flasim pak për Hueyden të dashuruar, keni një person në zemër që ju qëndron pranë momentalisht? Jeni e dashuruar? Unë kam shumë persona në zemër, prindërit, gjyshen (qesh). Le të themi që dashuria ime ka dalë dhe jashtë kësaj lidhjeje gjaku (qesh). Po, jam e dashuruar. Çfarë duhet të ketë mashkulli që të jetë me ju? As më shumë e as me pak çfarë ka Benjamini. Keni kërcyer, kënduar, shkuar, aktruar, si qëndrojnë bashkë të gjithë këto pasione tek ju? Gjithçka kam bërë është frut i pasionit dhe dëshirës për t'u shprehur në forma të ndryshme. Të shqetësojnë thashethemet që thuhen për ty? Cili është ai më i çuditshmi që të ka bërë përshtypje, ai me të cilin ke qeshur dhe ai me të cilin je mërzitur? Kam kohë që nuk merrem me thashethemet që thuhen për mua. Ma merr mendja që qarkullojnë të tilla, ashtu siç e di që do të ketë derisa unë do të vazhdoj të përballem me publikun, cilado qoftë forma artistike që do të ushtroj. Por, mund t'ju them vetëm gjë, kur isha e vogël, katër-pesë vjeç, me sa duket paskam dashur të kem një vëlla, e nisur nga kjo dëshirë, kisha sajuar një histori, ku u thosha të gjithëve se im atë kishte marrë me vete në Arabi Saudite tim vëlla. Sigurisht, disa javë me pas, e kisha harruar këtë histori. Jo më shumë se disa muaj më parë, tek parukierja dëgjova dikë të thoshte me shumë bindje se kur tim atë e kishin përzënë nga Shqipëria, ai kishte marrë djalin, ndërsa nënës sime i kishte rënë për rrisk të më mbante mua" (qesh). Aktore në një telenovelë franceze Është larguar nga Shqipëria për të shijuar një ofertë më të mirë që ka marrë nga Franca. Aktore në një telenovelë, e ku ka më mirë. Hueyda El Saied duhet tashmë ta marrë më shpesh avionin mes këtyre shteteve. Ajo është përzgjedhur të luajë rolin e Leas në telenovelën policore më të famshme franceze, "Femmes de loi", e cila transmetohet prej 7 vitesh në kanalin televiziv shtetëror "TF1". Hueyda momentalisht është rikthyer të jetojë në Paris. Ky është një shans tjetër që i ka trokitur në derë asaj, duke realizuar kështu veten. Ajo nuk është nga ato vajza që pretendon se fati vjen nga qelli, duke pohuar vazhdimisht se për një gjë është e sigurt, se gjithmonë di ta provokojë shansin.

» Shqiptare votoni per shqiperine Albania
» Berisha Ne 2017-n do e shnderrojme Shqiperine ne vendin me te zhvilluar