Himarë, përkujtohet Guma, mesha në gjuhën greke

HIMARE-  Sot shënohen 40 ditë nga dita kur i riu himarjot Aristotel Guma gjeti vdekjen në një aksident automobilistik.

Ceremonia përkujtimore nisi sot paradite në vendin ku ndodhi ngjarja dhe më pas në kishën Shën Pandon të Himarës me një meshë të mbajtur në gjuhën greke.

Korrespondeti i NEWS24, Enrik Mehmeti raportoi se në ceremoni ishin të pranishëm miq, familjarë dhe të afërm të të riut si dhe disa politikanë grekë, dhe një përfaqësi nga mitropoliti i Gjirokastrës.

NEWS24 raporton se mesha , e cila nisi në mëngjes në orën 08.00 dhe përfundoi rreth orës 11. 30 është zhvilluar e tëra në gjuhën greke.

Të pranishëm në ceremoninë meshtare kanë qenë politikanë grekë si dhe politikanë të tjerë shqiptarë përfaqësues të minoritetit.

Në meshë i pranishëm ishte prefekti i zonës të Atikës, deputeti i partisë së djathtë ekstremiste L.A.O.S i Athinës Spiridon-Andonis Georgiadhis, Deputeti i PASOK për Janinën Mihalis Pandullas, ish- prefekti i Selanikut, aktivist i Vorio- Epirit.

Rreth orës 09.45 minuta në meshë ka mbërritur dhe kreu i PBDNJ-së Vangjel Dule, kundërshtari i tij politik, Kristaq Kico, i cili është në krye të një partie të re minoritare MEGA, deputeti i PBDNJ-së Thoma Mico si dhe kryetari i Bashkisë së Himarës Vasil Bollano.

Në meshë ka qenë dhe metropoliti i Gjirokastrës me korin fetar të shkollës fetare të fshatit Bularat si dhe përfaqësues të FEVA- bashkimi koordinator studentor i betejave për Vorio- Epirin.

Për ceremoninë ishin prodhuar enkas dhe shumë pankarta ku dallohej qartësisht fytyra e të ndjerit e shkruhet se “Aristotel Guma, 37 vjeç nga Vorio-Epiri, Himara, u vra pse fliste greqisht. Gjuha jonë është shpirti jonë që nuk vdes, nuk mund të vritet”.

Policia nuk ka konfirmuar asnjëherë se vdekja e Gumës ka ndodhur pse fliste greqisht, por se ai ka vdekur në një aksident automobilistik, ndërkohë kanë përfunduar në pranga të akuzuarit si autorë të ngjarjes.

Pas meshës, të pranishmit janë drejtuar nga varrezat e qytetit për të bërë homazhe në varrin e Aristotel Gumës dhe më pas kanë zhvilluar vizitë në banesën e viktimës.

Mësohet se e gjithë ceremonia është zhvilluar në mënyrë paqësore dhe nuk është shënuar asnjë incident.

Në takimet e djeshme me kryeministrin Sali Berisha dhe ministrin e Jashtëm Edmond Haxhinasto, Sekretari i Përgjithshëm i MPJ greke,Yannis Zeppos ngriti shqetësimin e “politikës greke” për vrasjen e 37-vjeçarit Aleksandër Guma.

Nga ana e saj qeveria shqiptare është shprehur e palëkundur për arritjen e standarteve më të larta të mbrojtjes së të drejtave të njeriut dhe minoriteteve.
(s.g/BalkanWeb)