Bundesliga kalon Serinë A

UEFA ka një renditje për të gjithë kampionatet e
53 vendeve europiane dhe në bazë të këtij klasifikimi, merret parasysh
paraqitja e skuadrave nga secili kampionat në pesë vitet e fundit.








Gjergji Mima

Me humbjen e të tre skuadrave italiane në Champions dhe eliminimin e
Napolit nga Europa League, duke nisur nga sezoni i ardhshëm, Italia do
të dërgojë në Champions League vetëm tre skuadra.

Vendi i katërt i kalon Gjermanisë, që tashmë ka kampionatin e tretë më
të fortë në kontinent. Prej kohësh dihet se Bundesliga ishte në
avantazh, por ndeshjet e fundit sollën edhe konfirmimin matematikor.

UEFA ka një renditje për të gjithë kampionatet e 53 vendeve europiane
dhe në bazë të këtij klasifikimi, merret parasysh paraqitja e skuadrave
nga secili kampionat në pesë vitet e fundit.

Skuadrat gjermane, në këtë periudhë kohore, kanë shkuar më larg në
kompeticionet europiane. Ndonëse italianet kanë patur një ecuri disi më
të mirë në Champions, paraqitja në Europa League është e pakrahasueshme.

Ndërsa skuadrat gjermane kanë avancuar rregullisht midis katër më të
mirëve ose deri në finale, ato italiane e kanë patur të vështirë të
kalojnë edhe fazën e grupeve. Në sezonin aktual, Palermo, Juventus dhe
Sampdoria nuk e kaluan dot grupin, ndërsa vetëm Napoli avancoi, me shumë
vështirësi.

Në bazë të renditjes së UEFA-s, kampionatet e pozicionuar në vendet 1-3
kualifikojnë katër skuadra për në Champions. Kampionatet 4-6
kualifikojnë tre skuadra dhe ato nga vendi 7-15 nga dy ekipe. Shqipëria
ka aktualisht kampionatin e 43-të më të fortë të Europës.

- Renditja UEFA për kampionatet (shifra tregon pikët e mbledhura në 5 vjet)

1. Premier League (Angli) 82.9
2. Primera Division (Spanjë) 77,3
3. Bundesliga (Gjermani) 68,1
4. Seria A (Itali) 59,9
5. Division 1 (Francë) 53,5
6. Liga Sagres (Portugali) 44,5
.........................................
44. Superliga Shqiptare 3,8