Berisha në Shkodër nderon dëshmorët e demokracisë

Kryeministri Sali Berisha ishte të shtunën në Shkodër në
20-vjetorin e demonstratës antikomuniste të 2 Prillit, ku ka nderuar
kujtimin e katër dëshmorëve të demokracisë që u vranë gjatë asaj
proteste.
Berisha, i cili shoqërohej nga kryetarja e
Parlamentit, Jozefina Topalli dhe deputetë të tjerë të qarkut të
Shkodrës, vendosi kurora me lule mbi memorialet e tyre.
“Shkodra nuk pranoi shtypjen e komunizmit. 2 prilli 1991 është një ditë
historike dhe sot jemi mbledhur të përkujtojmë këtë ditë historike. Sot
nderojmë katër dëshmorët e demokracisë, të cilët I thanë “jo” regjimit
më të egër. Në 2 prill 1991, i thamë “jo” regjimit komunist,” deklaroi
kryeministri.
Nga memoriali, Berisha dhe grupi i deputetëve u drejtua për në
varrezat e Shkodrës ku bënë homazhe dhe vendosën kurora e lule mbi
varret e katër dëshmorëve të demokracisë, Arben Broci, Nazmi Kryeziu,
Bujar Bishanaku dhe Besnik Ceka./Telegrafi/